Fasteignir ríkissjóðs

Fasteignir ríkissjóðs hafa umsjón með fasteignum í eigu ríkisins í umboði fjármálaráðuneytis. Fjöldi þeirra, víðsvegar um landið, er um 290. Að auki tekur stofnunin fasteignir á leigu á almennum markaði og endurleigir þær stofnunum ríkisins.

Megin verkefni stofnunarinnar eru útleiga húsnæðis til ríkisstofnana og að viðhalda því og endurbæta svo það nýtist sem best starfsemi leigjenda.

Fasteignum ríkissjóðs hefur einnig verið falin umsjón með leiðréttingu á skráningu fasteigna ríkisins í opinberum skrám þannig að þær endurspegli rétta eignastöðu ríkisins. Ríkið geti að því búnu gert fullnægjandi grein fyrir eigum sínum hvað varðar fjölda, staðsetningu, notkun og verðmæti.

Heilbrigðisstofnanir

Fasteignir ríkissjóðs hafa frá og með síðustu áramótum tekið við umsjón með öllu húsnæði heilbrigðisstofnana ef frá er talið húsnæði Landsspítalans og Sjúkrahúss Akureyrar. Um er að ræða sjúkrahús, hjúkrunarrými og heilsugæslustöðvar um land allt, alls um 130 þús. m².

Afsláttur af húsaleigu

Vegna skerðingar á fjárheimildum til stofnana hefur orðið að samkomulagi við fjármálaráðuneytið að Fasteignir ríkissjóðs gefi tímabundinn afslátt af samningsbundinni húsaleigu vegna húsnæðis í eigu ríkisins. Í frumvarpi til fjárlaga fyrir árið 2010 er þannig gerð krafa um að Fasteignir ríkissjóðs gefi afslátt af húsaleigu sem nemur 35% til heilbrigðisstofnana en 7,5% af leigu til annarra.

Nýr starfsmaður

Fasteignum ríkissjóðs hefur bæst liðsauki en Guðmundur Jónsson, sem áður starfaði hjá Fasteignafélagi Hafnarfjarðar, hefur verið ráðinn til starfa sem verkefnisstjóri á sviði verklegra framkvæmda. Guðmundur, sem er byggingafræðingur, hefur víðtæka reynslu af umsjón fasteigna og verklegum framkvæmdum. Er hann boðinn velkominn til starfa.

Bænahúsið að Efri-Brú

Minnsta hús í umsjón Fasteigna ríkissjóðs er þetta bænahús að Efri-Brú í Grímsnesi.
Húsið er byggt af Böðvari Guðmundssyni, fyrrum bónda að efri Brú og er byggt eftir fyrirmynd af samskonar húsi sem mun hafa verið á þessum stað á 14. öld.

 

 

Eldri fréttir