Fasteignir ríkissjóðs

Í nágrannalöndum okkar hefur í vaxandi mæli verið hugað að aðferðum til að minnka líkindi á mistökum í undirbúnings- og hönnunarferli bygginga. Verulegt skref í þessa átt hér á landi er upptaka á byggingaupplýsingalíkani - „BIM – Building Information Model“. Fasteignir ríkisjóðs taka þátt í verkefninu sem á að taka um þrjú ár.

Aðferðafræði BIM byggist á því að allir aðilar verkefnis skiptast á upplýsingum sem tengjast viðkomandi byggingu í sameiginlegu upplýsingalíkani. Möguleiki er að hafa upplýsingar réttar á hverjum tíma og aðgengilegar í rafrænu umhverfi. Þetta gefur arkitektum, verkfræðingum, öðrum tæknimönnum og verkkaupum skýrt yfirlit yfir öll verkefni þeirra. BIM er notað á undirbúningsstigi, við hönnun, framkvæmd og mögulega við rekstur byggingarinnar. Skilgreindur er frá upphafi þáttur hvers aðila í ferlinu og gerðar ákveðnar kröfur um uppsetningu og vinnulag. Með markvissum vinnubrögðum mun hönnunarmistökum fækka.

BIM byggir á hlutbundinni hönnun og inniheldur fleiri gögn en eru í venjulegu CAD líkani. Kerfið geymir bygginguna í þrívídd með öðrum byggingartengdum gögnum. Til að auka samhæfingu er notaður opinn skráarstaðall, IFC, og aðrar viðmiðanir alþjóðasamtaka.

Hjá Framkvæmdasýslu ríkisins, FSR, hefur verið fylgst með þróun kerfisins, m.a. á Norðurlöndum. FSR á í samstarfi við NKS (Nordisk Kontakt for Statsbygninger) um kerfið. Danir eru komnir langt í þróun BIM og þar eru samstarfsaðilar Bips (Byggeri, informationsteknologi, produktivitet og samarbejde) og DDB (Det Digitale Byggeri). Á Íslandi var komið á þróunarvettvangi í mannvirkjagerð á árinu 2007. Markmið verkefnisins er að efla samstöðu meðal opinberra verkkaupa um notkun byggingaupplýsingalíkana í opinberum framkvæmdum til að auka gæði og bæta hönnun.

Verkefnið er í stórum dráttum eftirfarandi:

• Athuga hvernig aðferðafræðin hefur gengið í öðrum löndum, t.d. í Bandaríkjunum
• Setja upp innleiðingaráætlun á Íslandi til þriggja ára.
• Halda kynningarfundi, námskeið og ráðstefnur til að vinna aðferðafræðinni fylgi
• Vinna með stjórnvöldum við mótun staðla, gerð leiðbeininga og handbóka um kerfið

Í desember 2008 var formlega efnt til verkefnisins „BIM-Ísland“ með þátttöku níu stofnanna. Þær eru Brunamálastofnun, Fasteignir ríkissjóðs, FSR, Íbúðalánasjóður, Landsnet, Landsvirkjun, Nýsköpunarmiðstöð Íslands, Orkuveita Reykjavíkur, Framkvæmda- og eignasvið Reykjavíkurborgar og Samtök iðnaðarins. Ráðinn hefur verið starfsmaður til að stýra verkefninu hjá FSR. Hann mun vinna að upptöku kerfisins og hafa frumkvæði að kynningu BIM - aðferðafræði. Staðið verður fyrir námskeiðum og ráðstefnum ásamt því að aðstoða framkvæmdaaðila sem taka upp BIM - aðferðafræði.

Pistillinn er skráður með hliðsjón af upplýsingasíðu FSR um verkefnið - sjá hér.